一眼睇尽2016上半年旗舰手机！

嚟到年尾，相信就算部手机命不久矣，巴丝打都会尽量死顶到下年新机上场先换。等还等，总要有个谱知啲厂几时出机。外国电讯商T-Mobile日前喺波兰搞咗场发布会，当中出现一份2016上半年旗舰推出时间表，即刻睇吓咩料。

根据时间表，2016年会先以两部三星Galaxy及一部Lumia打头阵，及至春、夏季之间，两个品牌会再推新手机，数量跟年头相同。恕笔者无法推测出Lumia型号，现时有消息嘅得入门级Lumia 850，但两组共四部Galaxy应该分别係S7、S7+，以及Edge机种（亦有可能係Galaxy A系）。

第二季则由HTC率先发炮，九成係传闻嘅Perfume，紧接其后为四部LG（冇错，係四部，净知一定包G5），最后以两款Xperia作结，估计係Xperia Z6、Z6+。之前安兔兔就话Xperia Z6系列会出五种尺寸，感觉好离地，而家数量回落番去两部，好似正路啲。睇完时间表，大家可以开始制定换机策略，不过请将全部上市时间调早少少，事关欧洲地区出机一向比香港迟。